الاثنين، 26 ديسمبر 2011

مش قادرة اصدقك

مابقتش قادرة اصدقك
وبقيت باخاف
ياللي من كدبك انا
ياما قلبي شاف

ياما كنت باخلص لك وادوب
واشوف في حبك دنيتي
وكل مرة تقول هاتوب
وتقوم وتمسح دمعتي
وهو يو م ويفوت يادوب
والقا الخيانة قسمتي

خلتني اغير من كل واحدة تكلمك
وارجع واقول لأ مش كده
وكنت اخاف اعتب بكلمة لتألمك
وغصب عنى بابتسم بسمة رضا
وكتير باقول للقلب لأ ماتحبهوش
ده مايستاهلش الحب ده

وغصب عنى باعشقك والقلب ليك
وانتا اللى ناسي حبنا من غير الم
هايجي يوم يمكن اضيع من بين ايديك
ميهمنيش من اتظلم أو مين ظلم
لكن ساعتها هاجرك ده القلب مات
خلاص هاروح وابعد بلا دمعة ندم

لكن ساعات بارجع واقول يمكن تعود
يمكن تفوق م اللى انتا فيه
واصبر وصبري فى الهوى مالهوش حدود
حبك في قلبي لسه انا باقية عليه
هاتحس امته ان انا ياما عشت لك
هاتحس امته بالغرام هو انتا ايه؟


ليست هناك تعليقات:

إرسال تعليق